Comentario Editorial:
E Caya di Monche ta toca varios tema social-historico uzando e biografia di Monche (sr. Ramon Todd Danderé). A base di e descripcion bo ta premira di lesa tocante e historia di Elleboogstraat y tambe tocante e ola di migrante Latino Americano cu tin un conexion historico fuerte cu e Caya di Monche. Sinembargo, un sorpresa placentero ta cu e formato di e obra, cual ta uza e memorianan di Monche pa nabega e storia, ta permiti e autor comparti un variedad amplio di informacion tocante Aruba su Historia, Tradicion y Cultura.
Algun highlight pa Red Soil Publishing, tabata e oportunidad pa lesa algun experiencia doloroso manera e perdida di familiarnan ariba lama; cual te dia di awe ta keda un tema relevante ora nos ta papia di migrantenan cu ta cruza lama buscando un miho futuro. E obra no ta solamente conta nos ken tabata biba den E Caya di Monche, pero tambe kico tabata haci nan personanan memorabel. Tin ora anecdotanan humoristico y otro biahanan tragico. Di e mesun forma, e buki ta duna un bista breve ariba con ciudadanonan di Aruba a experencia Segundo Guera Mundial.
Un otro sorpresa inespera, tabata e pasashinan tocante construccion di cas na Aruba. Segun nos por a lesa, tabatin diferente custumber y creencianan cu tabata influencia e diseño, material y decoracion arkitectural di nos casnan. Algo cu awor nos sa tabata hunga un rol importante den crea distincion di clase na Aruba.
Den e mesun ambito informativo aki, e Caya di Monche ta tuma su tempo dunando nos un idea elabora di e spirito politco revolucionario cu tabata reina den cierto ciudadanonan di Elleboogstraat; influencia pa politica local y revolucionnan andante den region.
E ta husto pa bisa cu E Caya Di Monche ta un obra cu ta duna bo mas cu b’a pidi p’e y ta enrikece bo conocemento general cu cada capitulo lesa. Nos ta invita tur siguidor di Red Soil Publishing pa adkiri un copia Digital awe mes pa solamente 9.99 euro.
