Dia Nacional di Indigeneidad Arubiano

Indigena di Aruba, Caquetio

Ariba 11 di oktober 2021, diferente pueblo Indigena di e continente Americano ta celebra nan Indigeneidad y ta conmemora e ultimo dia di libertad di America Indigena prome cu e yegada di Cristobal Columbus ariba 12 di oktober 1492. Aunke e fecha aki ta referi specificamente na e yegada di Columbus na e islanan di Bahamas, su yegada na e Mundo Nobo pronto lo tabatin influencia ariba henter e pueblo Indigena di America y Caribe, incluyendo e civilisacion Caquetio di Aruba. 

A pesar cu e yegada di e colonistanan na e Mundo Nobo a destrui e civilisacion Caquetio cu tabata den pleno desaroyo, na Aruba nos no ta conmemora e Aruba Precolombino, ni tampoco tin un dia nacional pa celebra nos Indigeneidad. Un hecho peculiar considerando cu Aruba ta commercialisa orguyosamente ariba su raiznan indigena y tin un poblacion substancial cu ta geneticamente y genealogicamente Indigena. Prome cu nos por reflexiona ariba e falta di un Dia Nacional di Indigeneidad Arubiano, nos mester refresca nos memoria ariba con e yegada di Colombus den teritorio Caribense, a afecta Aruba. 

E influencia di Columbus ariba e pueblo Caquetio di Aruba

E lama Caribeño tabata e prome escenario di ecuentro entre e Colonistanan Spaño y civilisacionnan Indigena di e Mundo Nobo. Entre nan, e nacionnan Taíno, Cariben y Caquetio. Aunke e periodo pre-columbino ta termina pa cierto nacionnan na aña 1492, e lo dura añanan prome cu e influencia Europeo yega otro civilisacionnan Indigena. Strictamente poni, Columbus nunca a touch suela di Aruba. Sinembargo, su descubrimiento di ceronan di perla ariba e isla bisiña, Cubagua (Venezuela), a motiva otro colonistanan Spaño pa subi nan propio barco y bin colonisa y plunder teritorionan indigena. 

Asina ey, den augustus di 1499, e colonistanan Cristobal Guerra y Pedro Alonso Niño a yega pa prome biaha na Boneiro unda nan a mata varios indigena y despues secuestra 300 Caquetio pa bay bende como esclavo na Spaña. Rapidamente despues di esey, un avalancha di crimen humanitario a sigui contra nos ancestronan Caquetio di e islanan Aruba, Boneiro y Curacao. Locual a sigui e yegada di Columbus, ta mas cu tres siglo di sclavitud, traficacion, indoctrinacion catolico y un invasion total di nan tera, civilisacion y libertadnan cultural y spiritual. 

Na aña 1514, e conkistado Spaño, Diego Salazar, ta plunder e isla di Aruba y secuestra 2000 Caquetio. E Caquetionan ta wordo marca (kima) ariba nan cara y bendi como esclavo na Hispaniola [Santo Domingo y Haiti].
Indigena Caquetio di Aruba

Sinembargo, a pesar di e crimennan humanitario cometi contra e pueblo indigena di Aruba, e Caquetionan a haya nan mes den un situacion ‘geopolitico’ unico durante e era di colonisacion Spaño y Hulandes, cual a brinda posibilidadnan di sobreviviencia contra e atrocidadnan colonista. Asina nos por pensa ariba entre otro; e sistema di encomienda cu tabata prohibi e traficacion di e Caquetionan, e ambicionnan misionero di Iglesia catolico cu a conduci na cierto proteccion y retorno di Caquetionan secuestra na nos isla y e interesnan economico di e compania Hulandes WIC cu pa hopi aña a prohibi e establecimiento di colonistanan particular na Aruba. E peculiaridadnan geopolitico aki, den siglonan sumamente hostil, a traha espacio pa Aruba por a permanece un isla casi exclusivamente habita pa un poblacion indigena.

Nota cu mi no ta uza palabranan manera ‘suerte’, ‘privilegio’ of ‘situacion menos malo cu otro islanan’ pa describi e peculiaridadnan geopolitico aki cu a duna e Caquetionan un Chance of Survival. Historicamente, e literatura eurocentrico di Aruba a falta tanto e Caquetionan como e Africanonan sclavisa respet, pa medio di trivialisa nan status di personanan sclavisa, indoctrina, colonisa, pushando e idea cu nan tabatin algo di gradici na e colonisado. E perspectivanan apologista aki ta ignora e hecho cu aunke e situacion unico di Aruba a permiti pa e Caquetionan sigui habita e isla, nan no a scapa di maltrato, malesa, sclavitud, traficacion, indoctricacion y genocidio cultural. Literatura Arubiano merece mas perspectivanan historiografico cu ta amplifica e forsa, resistencia, ingeniosidad y abilidadnan pa asimila cu e Caquetionan a demostra den nan lucha di sobreviviencia contra colonialismo.

Un dia nacional pa celebra e Arubiano Indigena

Ariba un dia special unda historia indigena ta wordo conmemora, ta husto pa nos cuestiona dicon na Aruba nos no tin un celebracion of conmemoracion nacional pa nos propio historia. Independientemente di con un Arubiano ta identifica su mes den 2021, e prome habitantenan di Aruba ta indigena y e influencia di invasion Spaño ariba nos isla, ta innegabel. E motibo pakico esaki no a pasa ainda, mi lo purba analisa brevemente cu 2 rason den e articulo aki. 

E rol di catolicismo den e destruccion di identidad indigena

Si nos tira un bista ariba e dianan di fiesta nacional na Aruba, nos lo rapidamente nota cu 5 di e 11 dianan di fiesta nacional ta celebracionnan catolico: Bierna Santo, Dialuna di Pasco di Resureccion, Dia di asuncion, Pasco di Nacemento y Di dos dia di Pasco di Nacemento. E presencia marca di catolicismo den cultura di Aruba no ta un sorpresa. Catolicismo ta probablemente e herencianan colonial di mas influyente ariba nos isla. Ya caba na aña 1520, miembronan di clero Spaño a bini Aruba pa cuminsa un indoctrinacion catolico. Un di e tareanan principal di e encomenderonan Spaño, tabata pa subordina e Caquetionan bou di catolicismo. Un ehempel di esaki ta con e colonista, Gonzalo de Sevilla, tabata acompaña e sacerdotenan ariba nan crusada pa comberti e pueblo Indigena di Aruba den hendenan catolico. Generalmente, na momento cu un Caquetio tabata wordo bautisa, e tabata perde su nomber indigena y haya un nomber cristian. E hechonan aki ta importante, pasobra aunke catolicismo a penetra cada famia y organisacion di nos Aruba contemporaneo, nos no mester lubida con e religion aki a yega Aruba y cu cua intencion; Cual ta pa expande nan religion pa medio di erradica e cultura y creencianan indigena, cu e pretexto di trece salbacion pa e almanan Caquetio. Indoctrinacion catolico y crimennan colonial no ta dos entidad separa, sino misionnan complementario cu a yuda otro colonisa Aruba y destrui e civilisacion indigena di e Caquetionan. E celebracion di fiestanan catolico y no indigena, ta un manifestacion publico di e presente di un pasado di colonisacion.

Indigena Caquetio di Aruba

E impacto di colonisacion ariba e autodeterminacion di identidad

Den mi ultimo articulo, ‘E mito di e ultimo Caquetio’, mi a skirbi tocante mitonan di extincion indigena cu ta sigui reenforsa e presente di un pasado di colonisacion. Con e sistema colonial di pureza di sanger ta un metodo cu ta wordo uza pa invalida e existencia di Arubianonan Indigena den institutonan educativo, cultural y comercial. Mi ta ripiti esaki pa nos reflexiona ariba con un pueblo cu ta crece siguiendo un religion cu a yuda destrui e cultura di su antepasadonan y ricibiendo un educacion eurocentrico cu ta describi su indigeneidad como un realidad di un pasado hopi lehano, ta perde e abilidad pa reconoce su mes y eherece su autonomia di autodeterminacion etnico. E hecho cu na Aruba nos ta hopi jong den nos proceso di decolonisacion, ta haci cu ainda no tin suficiente discusionnan amplio ariba con nos ta identifica nos mes, kico nos ta bay haci tocante e perspectivanan eurocentrico di nos materialnan educativo, con esakinan a y ta sigui afecta di manera visibel y invisibel areanan fundamental di nos sociedad y Dicon nos ta mantene cierto structuranan colonial como e status quo ariba nos isla.  

Un testamento publico di decolonisacion

Decolonisacion ta un proceso di liberacion tanto structural sistemico como personal. Y e proceso di decolonisacion personal por cuminsa pa medio di cuestiona locual bo conoce di bo mes, bo famia, e historia di bo pais y con abo ta identifica bo mes. E ta un sensacion poderoso pa realisa cu bo no tin mester di permiso di ningun instancia of persona pa cuestiona bo cultura y embarca ariba un trayectoria di auto-descubrimento. P’esey, ariba un dia manera awe, mi ta hay’e importante pa nos reflexiona y cuestiona e falta di celebracion y conmemoracion indigena Arubiano ariba nivel nacional. E introduccion di un Dia Nacional di Indigeneidad Arubiano por ta un testamento publico di un Aruba cu ta compromete su mes pa embarca un proceso di decolonisacion necesario, pa medio di celebra no solamente su indigeneidad, pero alabes conmemorando e forsa, resistencia y contribucion incontabel di nos antepasadonan cu a sobrevivi siglonan di colonisacion Europeo. 

Joshuar Gomez
Joshuar Gomez

Joshuar Gomez is the author of ‘Amen cu Sanger’ and Co-Founder of the Aruban publishing house, Red Soil Publishing. A company dedicated to amplifying the voices of Afro-Indigenous writers. Gomez is currently a student of Media, Arts, Design & Architecture at the Vrije Universiteit of Amsterdam.

E mito di e ultimo Caquetio

October 11, 2021

Exclusion Mediatico di e Muhe Cunukero den Agricultura Arubano

October 11, 2021